حسام هو أحد أصدقائى على الفيس بوك ..عمرى ماشفته فى الحياه الحقيقيه وكان تواصلنا من خلال الحياه الافتراضيه ومع ذلك فهو الحقيقى واحنا افتراضيون ...ومش عارفه انى مشوفتوش ده سوء حظ ولا حسن حظ لكنه اكيد رحمة ربنا بيه .
خبر وفاته أصابنى بطعنه فى قلبى .
مش المره الاولى ولا الاخيره لفراق أحباب وأصحاب .
حسام كان ثورى حقيقى ومش تايوانى ..ثورى من أيام قتل خالد سعيد على أيد الداخليه .
كان كله امل فى مصر بكره وكان جواه شجاعه وحماس مكنتش بفهمهم .
لكنه فى الايام الاخيره كان واضح معاناته من اكتئاب مش عارفه سببه ..ربما مشاكل مش لاقى لها حلول وربما صدمه عاطفيه ..ربما وربما وربما .
حامل هم بكره لكن ..بكره حسام ماجاش .
ضيعت وقت كتير ياصاحبى على حاجات ماتستاهلش وناس ماتستاهلش ومعرفتش تعيش يومك .
من لحظه ماعيونا بتفتح الصبح ويمكن كمان واحنا نايمين بنفكر ونشيل الهموم وبنعانى من حاجات يمكن ماتحصلش او يمكن كمان مانلحقش نعيشها زى حسام .
مش كفايه بقى كدب وحروب وأكل فى بعض وغرور وتعالى وشيل هم وكره وأسفنه ومكايد وحقد وحسد وقلوب سودا ؟؟؟.
يابشر ...المحصله صفر ...........وبس
ليست هناك تعليقات:
إرسال تعليق